კანის ინფექციების პრევენცია და მკურნალობა

კანის ინფექციები ვითარდება მაშინ, როდესაც ბაქტერიები აინფიცირებენ კანს და ზოგჯერ მის ქვეშ არსებულ ღრმა ქსოვილებს.

• ცელულიტი: კანის ინფექციის გავრცელებული ტიპი, რომელიც იწვევს სიწითლეს, შეშუპებას და ტკივილს ინფიცირებულ ზონაში.
• კანის აბსცესი: კანქვეშ ჩირქის დაგროვება.

ადამიანის კანზე სხვადასხვა ტიპის ბაქტერია ბინადრობს. ცელულიტი ან აბსცესი შეიძლება განვითარდეს, თუ ჭრილობა ან კანის მთლიანობის დარღვევა ბაქტერიას ორგანიზმში შეღწევის საშუალებას მისცემს.

რისკ-ფაქტორები:

• კანის დაზიანება
• კანის დაავადებები (მაგ. „ათლეტის ტერფი“ ან ეგზემა)
• კიდურების ქრონიკული შეშუპება
• სიმსუქნე
• დიაბეტი

ცელულიტის სიმპტომები შეიძლება დაიწყოს მოულოდნელად ან გაძლიერდეს თანდათანობით:

• კანის სიწითლე
• ტკივილი
• კანი შეხებისას მგრძნობიარე ან ცხელია
• დაზიანებული ადგილის შეშუპება

აბსცესი იწვევს მსგავს სიმპტომებს, თუმცა ამ დროს კანქვეშ გროვდება ჩირქი, რომელმაც შეიძლება გარეთაც გამოჟონოს.

მიმართეთ სამედიცინო პერსონალს, თუ გაქვთ ცელულიტის ან აბსცესის სიმპტომები. მიუხედავად იმისა, რომ შემთხვევათა უმეტესობა მკურნალობას სწრაფად ექვემდებარება, ზოგიერთი მათგანი შეიძლება გავრცელდეს ლიმფურ კვანძებსა და სისხლში, რაც სიცოცხლისთვის სახიფათოა.

მნიშვნელოვანია: დაუყოვნებლივ მიმართეთ ექიმს, თუ 3 თვეზე ნაკლები ასაკის ჩვილს აქვს 38°C ან მეტი სიცხე.

ექიმი დასვამს დიაგნოზს ფიზიკური გამოკვლევისა და სიმპტომების გამოკითხვის საფუძველზე.

ცელულიტის სამკურნალოდ საჭიროა ანტიბიოტიკები.

აბსცესის შემთხვევაში, შესაძლოა საჭირო გახდეს ჩირქის დრენირება (გამოტანა). ანტიბიოტიკები შესაძლოა დრენირების შემდეგაც დაინიშნოს. მძიმე ინფექციების მკურნალობა ზოგჯერ საავადმყოფოში ხდება.

გვერდითი მოვლენები: ანტიბიოტიკებმა შეიძლება გამოიწვიონ გვერდითი ეფექტები — მსუბუქი გამონაყარიდან სერიოზულ პრობლემებამდე (მაგ. ანტიბიოტიკო რეზისტენტული ინფექციები ან C. diff ბაქტერიით გამოწვეული დიარეა). რაიმე გვერდითი მოვლენის გაჩენისას მიმართეთ ექიმს.

თუ დაგინიშნეს ანტიბიოტიკები:

• მიიღეთ ისინი ზუსტად ექიმის დანიშნულებისამებრ.
• არ გაუზიაროთ თქვენი ანტიბიოტიკები სხვებს და არ შეინახოთ ისინი მომავლისთვის.
• შეინარჩუნეთ ინფიცირებული ადგილი სუფთად.
• თუ ინფექცია ფეხზეა, მისი მაღლა აწევა დაგეხმარებათ შეშუპების შემცირებაში.

თქვენ შეგიძლიათ კანის ინფექციების პრევენცია შემდეგი ქმედებებით:

• ხშირად დაიბანეთ ხელები.
• დაიბანეთ კანის ჭრილობები საპნითა და წყლით.
• ესაუბრეთ ექიმს ისეთ ქრონიკულ დაავადებებზე (მაგ. დიაბეტი), რომლებიც ზრდის კანის ინფექციების რისკს.

დამატებითი ინფორმაციისთვის ეწვიეთ: www.cdc.gov/antibiotic-use