გაციების პრევენცია და მკურნალობა

გაციება არის ზედა სასუნთქი გზების მსუბუქი დაავადება, რომელიც მოკლე დროში თავისით გაივლის.

• სიმპტომები, როგორც წესი, პიკს აღწევს 2-3 დღეში:

  • ცემინება
  • ცხვირის გაჭედვა
  • ყელის ტკივილი
  • ხველა
  • სიცხე (თუმცა გაციებისას ადამიანების უმეტესობას სიცხე არ აქვს)

  მნიშვნელოვანია: როდესაც ვირუსი ცხვირსა და სინუსებს აინფიცირებს, ცხვირი გამოყოფს გამჭვირვალე ლორწოს, რაც ხელს უწყობს ვირუსების გამოდევნას ცხვირიდან და სინუსებიდან. 2-3 დღის შემდეგ ლორწო შეიძლება გახდეს თეთრი, ყვითელი ან მწვანე. ეს ნორმალურია და არ ნიშნავს, რომ ანტიბიოტიკი გჭირდებათ. სურდო და ხველა შეიძლება 10-14 დღემდე გაგრძელდეს.ეს სიმპტომები დროთა განმავლობაში უნდა გაუმჯობესდეს.

  გაციებას შეიძლება ჰქონდეს გრიპის მსგავსი სიმპტომები. მხოლოდ სიმპტომების მიხედვით მათი გარჩევა შეიძლება რთული (ან თუნდაც შეუძლებელი) იყოს.

  

გაციებას იწვევს 200-ზე მეტი სახეობის ვირუსი (ყველაზე ხშირად — რინოვირუსები). ისინი ვრცელდება ჰაერით და ახლო კონტაქტით.

როდის მივმართოთ ექიმს?

მიმართეთ სპეციალისტს, თუ გაქვთ:

• სუნთქვის გაძნელება ან გახშირებული სუნთქვა
• დეჰიდრატაცია (გაუწყლოება)
• სიცხე, რომელიც 4 დღეზე მეტხანს გრძელდება
• სიმპტომები, რომლებიც 10 დღეზე მეტხანს გრძელდება გაუმჯობესების გარეშე
• ქრონიკული დაავადებების გაუარესება

ეს სია ყოვლისმომცველი არ არის. ნებისმიერი მძიმე ან შემაშფოთებელი სიმპტომის შემთხვევაში, მიმართეთ სამედიცინო დაწესებულებას!

ყურადღება: დაუყოვნებლივ მიმართეთ ექიმს, თუ 3 თვეზე ნაკლები ასაკის ბავშვს აქვს 38°C ან მეტი სიცხე.

გაციების საწინააღმდეგო "წამალი" არ არსებობს — ის თავისით გაივლის ანტიბიოტიკების გარეშე. არასაჭირო დროს გამოყენებულმა ანტიბიოტიკმა შეიძლება ზიანი მოგაყენოთ გვერდითი მოვლენების განვითრებით (ალერგია, რეზისტენტული ინფექციები, დიარეა). გვერდითი მოვლენები შეიძლება იყოს მსუბუქი რეაქციებიდან, როგორიცაა გამონაყარი, უფრო სერიოზულ ჯანმრთელობის პრობლემებამდე. ეს პრობლემები შეიძლება მოიცავდეს მძიმე ალერგიულ რეაქციებს, ანტიმიკრობული რეზისტენტულ ინფექციებს და C. diff ინფექციას. C. diff იწვევს დიარეას, რამაც შეიძლება გამოიწვიოს მსხვილი ნაწლავის მძიმე დაზიანება და სიკვდილი.    იხილეთ:.https://skillio.ge/mdzime-diarea-c-diff-inpheqtsia/

• დაისვენეთ და მიიღეთ ბევრი სითხე.
• გამოიყენეთ ჰაერის დამატენიანებელი ან ფიზიოლოგიური ხსნარის სპრეი.
• პატარა ბავშვებისთვის გამოიყენეთ რეზინის ასპირატორი ცხვირის გასაწმენდად.
• მიიღეთ თაფლი ხველის დასამშვიდებლად (1 წლიდან ზემოთ).
• ტკივილგამაყუჩებლები: 6 თვემდე ბავშვებს მიეცით მხოლოდ პარაცეტამოლი; 6 თვიდან შეიძლება იბუპროფენიც.
• არასოდეს მისცეთ ასპირინი ბავშვებს — მან შეიძლება გამოიწვიოს რეის სინდრომი, რომელიც ძალიან სერიოზული, მაგრამ იშვიათი დაავადებაა, მან შეიძლება დააზიანოს ღვიძლი და ტვინი.                                  
• ხველისა და გაციების საწინააღმდეგო მედიკამენტები:
• 4 წლამდე ასაკის ბავშვებში არ გამოიყენოთ ურეცეპტოდ გაცემული ხველისა და გაციების საწინააღმდეგო მედიკამენტები, თუ ექიმი კონკრეტულად არ გირჩევთ, რადგან თვითნებურმა მოხმარებამ შეიძლება გამოიწვიოს სერიოზული და ზოგჯერ სიცოცხლისთვის საშიში გვერდითი მოვლენები პატარა ბავშვებში.
• 4 წლის და უფროსი ასაკის ბავშვების მედიკამენტოზური მკურნალობა განიხილეთ თქვენს პედიატრთან, უსაფრთხოა თუ არა ურეცეპტოდ გაცემული ხველისა და გაციების საწინააღმდეგო მედიკამენტების მიცემა თქვენი ბავშვისთვის.

ჰკითხეთ თქვენს ექიმს ან ფარმაცევტს თქვენი ბავშვის ასაკისა და წონის  შესაბამისად ურეცეპტოდ გაცემული მედიკამენტების სწორი დოზირების შესახებ. ასევე, აცნობეთ თქვენს პედიატრს ყველა იმ რეცეპტით და ურეცეპტოდ გაცემული მედიკამენტის შესახებ, რომელსაც ისინი იღებენ.

• ხშირად დაიბანეთ ხელები.   იხილეთ.https://skillio.ge/khelis-higiena/
• მოერიდეთ დაავადებულ ადამიანებთან ახლო კონტაქტს.
• დაიფარეთ პირი ხველის ან ცემინებისას.
• ნუ შეეხებით თვალებს, ცხვირს და პირს დაუბანელი ხელებით.
• ავადმყოფობისას დარჩით სახლში, არ გაუშვათ ავადმყოფი ბავშვები ბაღში და სკოლაში.

დამატებითი ინფორმაციისთვის ეწვიეთ: www.cdc.gov/antibiotic-use