რჩევები პაციენტის უსაფრთხოებისთვის

იცოდით, რომ ინფექციები შეიძლება დაგემართოთ სამედიცინო დაწესებულებებში სხვა დაავადების მკურნალობის დროს?

 სამედიცინო მომსახურებასთან ასოცირებული  ინფექციები (სმაი) შეიძლება გავრცელდეს ადამიანიდან ადამიანზე ხელებით, სამედიცინო აღჭურვილობისა და სხვა საშუალებებით. სმაი-ები სულ უფრო 

მდგრადი ხდება ანტიბიოტიკებისა და სოკოს საწინააღმდეგო პრეპარატების მიმართ , რაც მათ მკურნალობას ართულებს და ზოგჯერ შეუძლებელს ხდის.

პაციენტებს და მათ ახლობლებს შეუძლიათ ხელი შეუწყონ სმა ინფექციების პრევენციას, მათ შორის ანტიმიკრობული პრეპარატების მიმართ რეზისტენტული მიკრობებით გამოწვეული ინფექციების. ეს რჩევები აღწერს, თუ როგორ დაიცვათ  პაციენტის უსაფრთხოება და შეამციროთ ინფექციების რისკი.

1. აცნობეთ თქვენს ექიმს ( სამედიცინო პერსონალს) ბოლო დროს ჩატარებული ნებისმიერი მკურნალობის შესახებ.
2. აცნობეთ თქვენს ექიმს ( სამედიცინო პერსონალს), თუ ფიქრობთ, რომ გაქვთ ინფექცია ან თუ თქვენი ინფექცია პროგრესირებს.
3. მიიღეთ ანტიბიოტიკები ზუსტად დანიშნულებისამებრ და აცნობეთ თქვენს ექიმს, თუ გაქვთ რაიმე გვერდითი მოვლენა, მაგალითად, დიარეა.
4. შეახსენეთ პერსონალს და ვიზიტორებს ხელების სისუფთავის დაცვის შესახებ.
5. მიეცით პერსონალს თქვენი ოთახის დალაგების საშუალება.

ნებისმიერი მკურნალობის შესახებ

აუცილებლად აცნობეთ თქვენს ექიმს ( სამედიცინო პერსონალს), თუ:

• სხვა დაწესებულებაში იყავით ჰოსპიტალიზებული
• ბოლო ექვსი თვის განმავლობაში მიიღეთ სამედიცინო მომსახურება თქვენი ქვეყნის ფარგლებს გარეთ
• ოდესმე გქონიათ ანტიმიკრობულ საშუალებებზე რეზისტენტული ინფექცია.

დაუკავშირდით ექიმს ( სამედიცინო პერსონალს)

• დასვით ნებისმიერი კითხვა ან თუ გაღელვებთ რამე მდგომარეობა, მიმართეთ თქვენს ექიმს ( სამედიცინო პერსონალს). ჰკითხეთ, რას აკეთებენ ისინი თქვენს დასაცავად.
• თუ ფიქრობთ, რომ ინფექცია გაქვთ და ის არ უმჯობესდება ან, პირიქით, უარესდება, აცნობეთ თქვენს ექიმს ( სამედიცინო პერსონალს) . დასვით კითხვა: „შესაძლოა ეს სეფსისი იყოს?“
• თუ გაქვთ საშარდე გზების ან ცენტრალური ვენური კათეტერი, ყოველდღიურად იკითხეთ, თუ როდის შეიძლება მათი ამოღება. კათეტერის დიდხანს დატოვება ინფექციის განვითარების შანსს ზრდის
• იცოდეთ ინფექციის ნიშნები და სიმპტომები. კანის ზოგიერთი ინფექცია ვლინდება სიწითლით, ტკივილით ან გამონადენით ინტრავენური კათეტერის ან ქირურგიული ჩარევის ადგილას. კანის ინფექციებს, როგორც წესი, თან ახლავს  სიცხეც
• დაჟინებით სთხოვეთ თქვენს მომსახურე სამედიცინო პერსონალს, რომ არასდროს გამოიყენონ ნემსი ან შპრიცი ერთზე მეტ პაციენტზე.
• აცნობეთ თქვენს ექიმს, თუ 24 საათის განმავლობაში დიარეის სამი ან მეტი ეპიზოდი გაქვთ, განსაკუთრებით თუ ანტიბიოტიკს იღებთ.

მიიღეთ ანტიბიოტიკები ზუსტად ისე, როგორც დანიშნულია

• ანტიბიოტიკები მხოლოდ მაშინ მიიღეთ, როდესაც თქვენი ექიმი ფიქრობს, რომ ისინი გჭირდებათ
• თუ ანტიბიოტიკები დაგინიშნათ, იკითხეთ, აუცილებელია თუ არა მისი მიღება
• მიჰყევით ყველა ინსტრუქციას, რომელიც მათ მიღებასთან დაკავშირებით გაქვთ
• აცნობეთ თქვენს ექიმს ( სამედიცინო პერსონალს), თუ გაქვთ რაიმე გვერდითი მოვლენა, როგორიცაა დიარეა.

განაგრძეთ კითხვა: ანტიბიოტიკების დანიშვნა და გამოყენება

ხელების დაბანა ხშირად ხელს უშლის მიკრობების გავრცელებას, მათ შორის რეზისტენტული მიკრობებისას

• ადამიანებმა ხელები უნდა დაიბანონ ყოველ ჯერზე, როცა თქვენს ოთახში შემოდიან, ასევე აღჭურვილობის, უშუალოდ თქვენთან ან თქვენს ჭრილობასთან შეხებამდე და შეხების შემდეგ და სხვა. ეს ეხება სამედიცინო პერსონალს და თქვენს გარემოცვას, როგორიცაა ოჯახის წევრები და მეგობრები.
• დასვით კითხვები: „გამოკვლევის დაწყებამდე, ხომ არ შეწუხდებით, რომ ხელები ისევ დაიბანოთ?“ და „შეგიძლიათ ხელები დაიბანოთ სახვევების შეცვლამდე?“

განაგრძეთ კითხვა: სამედიცინო დაწესებულებებში ხელის ჰიგიენის შესახებ

მიეცით პერსონალს საშუალება, დაალაგოს თქვენი ოთახი.

მნიშვნელოვანია, რომ საავადმყოფოში ან სხვა სამედიცინო დაწესებულებაში ყოფნისას ოთახი სუფთა იყოს. ნუ იტყვით - „მოგვიანებით დაბრუნდით“. მაშინაც კი, თუ ეს თქვენთვის არასასურველ დროს ხდება, მიეცით პერსონალს საშუალება, დაალაგოს თქვენი ოთახი.

• სამედიცინო პერსონალს შეიძლება ეცვას ხალათები და ხელთათმანები, რათა თავიდან აიცილონ მიკრობების გავრცელება ხელებითა და ტანსაცმლით
• პერსონალმა ხალათი კისერსა და ზურგზე ისე უნდა შეიკრას, რომ წინა მხარე და მხრები იყოს დაფარული.

რეზისტენტული მიკრობების ადრეული იდენტიფიცირება და მკურნალობა ხელს უწყობს მათი გავრცელების პრევენციას.

• თქვენ შეგიძლიათ რეზისტენტული მიკრობის მატარებელი იყოთ მაშინაც კი, თუ სიმპტომები არ გაქვთ
• თუ ჯანდაცვის პერსონალი მოგთხოვთ რეზისტენტული მიკრობის ტესტის ჩატარებას -დაეთანხმეთ. ტესტირება პერსონალს სწორი ანტიბიოტიკის ან სოკოს საწინააღმდეგო მკურნალობის შერჩევაში ეხმარება
• ჰკითხეთ თქვენს ექიმს, ან სამედიცინო პერსონალს, რას გააკეთებენ ისინი და დაწესებულება თქვენი და თქვენი ოჯახის ანტიმიკრობული საშუალებების მიმართ რეზისტენტული ინფექციისგან დასაცავად

განაგრძეთ კითხვა: ანტიმიკრობული რეზისტენტობის შესახებ

იყავით უსაფრთხოდ ოპერაციამდე და ოპერაციის შემდეგ

• ქირურგიული ჩარევის მიდამოს ინფექციების (SSI) თავიდან ასაცილებლად, მიიღეთ ზომები, მაგალითად, აცნობეთ თქვენს ექიმს, ან სამედიცინო პერსონალს სხვა სამედიცინო პრობლემების შესახებ. არ გაიპარსოთ ოპერაციის ჩატარების ადგილი ან მიმდებარე მიდამო

მასალა მომზადებულია შემდეგ წყაროებზე დაყრდნობით:

1.https://www.cdc.gov/patient-safety/campaigns/index.html ( ხელის ჰიგიენა)

2.https://www.cdc.gov/clean-hands/hcp/clean-hands-count/index.html ( ხელის ჰიგიენა)

3.https://www.cdc.gov/sepsis/get-ahead-of-sepsis/index.html ( სეფსისი)

4.https://www.cdc.gov/dialysis-safety/about/index.html ( დიალიზი)